सांदण

जरी कोकणस्थ असले तरी आमचे कोकणात घर नसल्याने कोकणच्या गावात राहण्याचा अनुभव नाही. मात्र अनेकवेळा कोकणात आडबाजूच्या गावांमध्ये ’होम स्टे’ चा अनुभव घेतला आहे आणि तो प्रत्येकवेळी अविस्मरणीयच ठरला आहे. नारळी पोफळीच्या सानिध्यात होम स्टेच्या घरात राहतांना, तिथल्या साध्या पण सकस पदार्थांची चव अजूनही जिभेवर आहेच. उकडीचे मोदक, घावन घाटलं, निवग-या, तांदूळाच्या भाकरी, फणसाची भाजी, ओल्यानारळाची चटणी, तक्कू, सोलकढी आणि सांदण. आज अचानक सांदण करुयात असं (व्यायाम करतांना) मनात आलं. सांदण - हे त्याचे नाव आणि रंग दोन्ही मोहक आहेत. तांदूळाचा रवा होताच, नारळाच्या दुधाऐवजी साधं दूध घातलं, चवीनुसार साखर घातली, आंब्याचा रस घातला आणि थोडंस मुरु दिल. इथे खरंतर थोड जास्त मुरु द्यायला हवं होत मात्र मला ऑफिसच्या कामाला सुरुवात करायची असल्याने शक्य नव्हतं. मग चिमूटभर बेकींग पावडर घालून छान वाफवून घेतलं. अहाहा... साजूक तुपाबरोबर सांदणामुळे आजच्या ब्रेकफास्ट रंगतदार झाला.

सांदण

मात्र त्यापेक्षाही लेकीने काढलेला हा नेटका आणि कल्पक फोटो मनाला अधिक भावला !!

- भाग्यश्री केंगे

छायाचित्र : मृण्मयी केंगे
#marathiworld #gracefulwomen #foodphotography #foodblogging #marathirecipes