Graceful Women : ओणम मैत्रीचा

तुमची लाडकी मैत्रीण तीन वर्षांनी तुमच्याकडे राहायला येते तेव्हा झालेला आनंद खाण्यातून व्यक्त करावा असे वाटले. गणपतीच्या दिवसातले गोड खाऊन कंटाळलेल्या तिला ओणमच्या निमित्ताने सद्या करूयात असे ठरवले, अर्थात मिनी रुपात. केरळच्या आठवणीतली खाद्यभ्रमंती आणि यु-ट्यूबच्या साहाय्याने पदार्थ निश्चित केले.

पुली इनसी (आल्याचे लोणचे), नेल्लीक्का आचार (आवळ्याचे लोणचे), वेन्डकाय पचडी (भेंडीची कोशिंबीर) , थोरन (कोबीची भाजी stir फ्राय), ओळण (कोहळा आणि चवळी नारळाचे दूध घालून), कुटकरी (सुरण, कच्ची केळी आणि काळे चणे), श्रावण घेवडा (भरपूर ओला नारळ घालून), लेमन रस्सम, साधं वरण, भात, केळं, जिरे- कढीपत्ता घातलेले ताक आणि सोबतीला जिरे घालून गरम पाणी. मी माझ्या पध्द्तीने ह्यात बदल केले. थोरण मध्ये गाजरा ऐवजी सिमला मिरची घातली, कुटकरी मध्ये सुरणाऐवजी रताळी आणि कच्च्या ऐवजी पिकलेली केळी वापरली.

ओळण मध्ये कोहळ्या ऐवजी दुधी भोपळा वापरला. ह्यात आवडीपेक्षा ही त्यावेळेला उपलब्ध असलेल्या भाज्यांना झुकते माप दिले. अवियल करायची इच्छा होती, मात्र सगळ्या भाज्या जमवण्यात वेळ गेला असता. मला केळ्याचे वेफर्स, शक्करवराती आणि जेवणासाठी केळ्याची पानं आणून ठेवायला हवी होती. असो, पण झालेले पदार्थ चविष्ट झालेत ह्याची पावती मला मिळाली. खाण्याची मजा, मोठ्या आवाजात आरत्या आणि हातानी केलेल्या बाप्पाचे कौतूक. मैत्रीचा ओणम तर झोकात साजरा झाला.